हिले–पाख्रीबास सडक निर्माणमा चरम लापरर्बाही

धनकुटा- पुर्वीपहाडका भोजपुर र संखुवासभा जिल्लालाई तराई सँग जोडने मध्यपहाडी लोकमार्ग अन्तर्गत हिले–पाख्रीबास सडक खण्डको सडक स्तरोन्नतीको कार्य गुणस्तरहीन भएको पाईएको छ ।

फाईल तस्वीर

‘द कञ्चनजङ्घा रायमाझी मोतीदान जेभी’ले हाल निर्माण गरिरहेको १३ किलोमिटर सडक–खण्ड गुणस्तरहीन भएको उपभोक्ताको गुनासो गरेका हुन । जसअन्तर्गत हिलेदेखि पञ्चेसम्मको १३ किलोमिटर सडकमा सवारी गुड्नै सक्ने अवस्थामा नरहेको यात्रुहरुको गुनासो छ ।

ठेकेदार कम्पनीले तीन वर्षमा काम सम्पन्न गर्ने गरी २०७२ चैत २ गते  सम्झौता गरेको थियो । हिलेदेखि पञ्चेसम्मको १३ किलोमिटर सडक निर्माण गर्न ३८ करोड २३ लाख २४ हजार ४ सय ६६ रुपैयाँमा सम्झौता गरेको कम्पनीले हाल सम्म ६५ प्रतिशत मात्र काम गरेको छ ।

मङ्गलबार सङ्घीय सांसद् राजेन्द्रकुमार राईले निर्माण व्यवसायीले कामै नगरी २८ करोडभन्दा बढी रकम भुक्तानी लगेकोमा आक्रोंस पोखे । सांसद् राईले भने, ‘सडकमा गाडी त गुडेन, गुडेन, खुट्टाले टेकेर हिँड्न सक्ने समेत अवस्था रहेन ।’

तीन वर्षमा निर्माण सम्पन्न गर्ने सम्झौता गरे पनि ६ वर्षमा पनि काम सम्पन्न नभएकोमा अब पाख्रीबास नगरपालिका आफैले जिम्मा लिने जनाएको छ ।

जिल्ला प्रशासन कार्यालयमा १४ पटकसम्म बैठक बसेर निर्माण कम्पनीलाई सडक निर्माणको लागि दबाव दिँदा पनि काम नभएको जिल्ला समन्वय समितिका प्रमुख टङ्क चौहानले बताए ।

तोकिएको मापदण्ड र समय अवधिमा काम नगर्ने ठेकेदार र निर्माण कम्पनीलाई कालो सूचीमा राखेर कडाभन्दा कडा कारबाहीको प्रक्रिया अगाडि बढाउने परियोजनाले वताएको छ । मध्यपहाडी लोकमार्ग हेर्ने परियोजनाका प्रमुख दीपक केसीले ठेकेदार कम्पनीले आफूले गरेको गल्ती स्वीकार गरिसकेको बताए ।

निर्माण कम्पनीले सम्झौता अवधिमा काम सम्पन्न नगरेको र मापदण्ड बमोजिम काम नभएकाले परियोजनाको तर्फबाट पनि आवश्यक कारबाहीको प्रक्रिया अघि बढाउने तयारी भइरहेको बताए । परियोजनाका इञ्जिनियर अवदेश यादवले ६५ प्रतिशत काम गरेको निर्माण कम्पनीलाई ७४ प्रतिशत रकम भुक्तानी दिनु नै गल्ती भएको बताए ।

उनले पञ्चे–लेगुवा सडक–खण्डमा भने सन्तोषजनक काम भइरहेको बताए । हालसम्म भ्याटबाहेक कुल ३९ करोडमा ५५ प्रतिशत कामको प्रगति पूरा गरेर १८ करोड मात्र भुक्तानी लगेको र काम भइरहेको यादवले दाबी गरे ।

पाख्रीबास नगरपालिकाका प्रमुख वृषबहादुर राईको अध्यक्षतामा सम्पन्न पत्रकार सम्मेलनमा पाख्रीबास नगरपालिका अन्तर्गतका १० वटै वडाका वडाध्यक्षहरू, विभिन्न पार्टीका नेता तथा कार्यकर्ताहरू र सर्वसाधारण उपभोक्ताको उपस्थिति रहेको थियो । उनीहरूले सो अवसरमा सडक कालोपत्रे गर्न सडकमा राखेको गिट्टीसमेत हिलाम्मे सडकमा डोजरमार्फत् हालेको बताए ।

पाख्रीबास र हिलेको बीचमा सडक पिच गर्न ३ वर्षअघि तयार गरेको गिट्टी सबै हिलाम्मे सडकमा लगाइदिएकाछन् । वर्षौंदेखि हिले–पाख्रीबास–लेगुवा सडक–खण्ड हिलाम्मे र धुलाम्मे हुँदा सो सडक हुँदै भोजपुर, सङ्खुवासभा जाने सवारी साधन र यात्रुले सास्ती खेप्दै आएका छन् । केहि दिन अघि उपचारको लागि घरान लग्दै गरेको अवस्थामा सडककै कारण समयमा हस्पिटल पुर्याउन नसक्दा भोजपुरकी एक नवजात शिशुको ज्यान गएको थियो ।

सङ्घीय सांसद् राजेन्द्रकुमार राई, जिल्ला समन्वय समितिका प्रमुख टङ्कबहादुर चौहान, पाख्रीबास नगरपालिकाका प्रमुख वृषबहादुर राईले संयुक्तरूपमा पत्रकार सम्मेलन गरेर सडक निर्माणमा निर्माण व्यवसायीबाट भएको लापरबाहीको विषयमा उपभोक्तालाई जानकारी गराए हुन ।