उपराष्ट्रपति पुन मार्फत शासन गर्ने योजना पर्दाफासपछि संसद विघटन

काठमाडौं- सत्तारुढ नेकपाभित्रका प्रचण्ड, माधव नेपाल समूहले राष्ट्रपति विद्यादेवी भण्डारीविरुद्ध महाभियोग प्रस्ताव र प्रधानमन्त्री केपी शर्मा ओलीविरुद्ध अविश्वास प्रस्ताव ल्याउने तयारी बुझेपछि सरकारले संसद् विघटनको सिफारिस गरेको खुल्न आएको छ ।

ओली विरोधी समूहले त्यसको लागि हस्ताक्षर गरी संसदमा दर्ता गर्ने अन्तिम तयारी थालेको थियो ।
राष्ट्रपतिविरुद्ध प्रस्ताव दर्ता गरी निस्क्रिय बनाएपछि उपराष्ट्रपति नन्दबहादुर पुन मार्फत आफ्ना योजना पूरा गर्ने दाउमा यो समूह लागेको थियो ।

उक्त सूचना शितल निवास र बालुवाटारमा लिक भएपछि ओलीले आइतबार विहान आकस्मिक रुपमा मन्त्रिपरिषद बैठक बोलाई विघटन सिफारिस गरेको प्रचण्ड निकट एक नेताले खुलानेपाललाई जानकारी दिए ।

मन्त्रिपरिषद बैठकले विघटनको लागि राष्ट्रपति विद्यादेवी भण्डारीसमक्ष संसद विघटनको सिफारिस गर्ने निर्णय गरेको हो । उक्त सिफारिस राष्ट्रपति कार्यालय लगिँदै छ । नेकपाभित्र चुलिएको विवादसँगै भएको यो निर्णयले मुलुकलाई फेरी अस्थिरतातर्फ धकेलेको छ ।

प्रधानमन्त्री केपी शर्मा ओलीलाई अध्यक्ष र प्रधानमन्त्री दुवै पदबाट राजिनामा दिन माग गर्दै पार्टीका बरिष्ठ नेताहरुले ६ महिनादेखि घेराबन्दी गर्दै आएका थिए । खुुल्ला नेपालवाट