भोजपुर । भोजपुर बैंक रोडका युवा विकास निर्माणमा जुटेका छन् । भोजपुर नगरपालिका–७ स्थित बजार तथा कार्यालयबाट निस्केको ढल व्यवस्थापनका लागि सेफ्टीट्याङ्की निर्माणमा स्थानीय युवा एकजुट भएका हुन् ।
“आफ्नो ठाउँको लागि आफैँले नगरे कसैले गर्दैन, त्यसैले हामी युवा नै लागि परेका हौँ” स्थानीय युवा पङ्कज श्रेष्ठले बताए ।
जिल्ला समन्वय समितिको रु पाँच लाख बजेट र स्थानीयको २० प्रतिशत सहयोगमा उक्त ट्याङ्की निर्माण गर्न लागिएको बैंक रोड ढल सुधार समितिका अध्यक्ष चन्द्रकुमार श्रेष्ठले बताए ।
ट्याङ्की निर्माणका लागि २०७० सालमा समितिले नगरपालिकामै दुई आना जग्गा रु तीन लाखमा खरिद गरेको थियोे । बजार क्षेत्रका ४२ घर, जनसेवा आधारभूत विद्यालय र अधिकांश कार्यालयको लागि समेत ढल व्यवस्थापनमा टेवा पुग्ने स्थानीयवासीको भनाइ छ ।
घरहरु बाक्लो र थोरै जग्गा भएकाले निकासको समस्याका कारण ढल व्यवस्थित नहुँदा प्रदूषण बढिरहेको थियो, अब त्यस्तो समस्या नहुने स्थानीय तथा समिति सदस्य सञ्जीव श्रेष्ठले बताए ।
ढल व्यवस्थापन भएपछि वर्षौंदेखि खुल्ला दिसामुक्त बन्न नसकेको सदरमुकाम खुल्ला दिसामुक्त जिल्ला घोषणा हुने भएको छ । रासस
