भोजपुर । भोजपुरका धेरै गायक र गायिका राष्ट्रिय स्तरमा संगित क्षेत्रबाट आफ्नो नामलाई चम्काउन सफल भएका छन् । यसपटक पनि लामो समयदेखि संगित क्षेत्रमा काम गरिरहेका भोजपुरे गायक छैटौं ‘म्यूजिक खबर म्यूजिक अवार्ड–२०७४’ को लागि मनोनयनमा गायक श्याम सामसोङ पर्नु भएको छ । गायक श्याम सामसोङको पछिल्लो एल्बम ‘मुर्चुङ्गा-२’ को “पर्दाफास भो” बोलको गितबाट सर्वोत्कृष्ट गायक विधाबाट मनोनयनमा पर्नु भएको हो । यही आउदो असार २९ गते राष्ट्रिय नाचघर जमलको प्रेक्षालयमा सम्पन्न हुन गइरहेको अवार्डका लागि सर्वोत्कृष्ट पप गायक विधाका लागि गायकहरु अमिर देउला, उदेश श्रेष्ठ, डेबिट शंकर, सुरज श्रेष्ठ र श्याम सामसोङ मनोनयनमा परेका छन् ।

पप गायक श्याम सामसोङ सगैँ अन्य गायकहरुपनि मनोनयनमा परेका छन् । अमिर देउला ‘मेरो भविश्य’ , उदेश श्रेष्ठ ‘ती नजर’ , डेबिट शंकर ‘आइकम विकम’ , सुरज श्रेष्ठ ‘भुल्यौ कि’ र श्याम सामसोङ ‘पर्दाफास भो’ गितहरुबाट मनोनयनमा परेका हुन् ।

यी गायकहरु मध्येबाट कुनै एकले ‘सर्वोत्कृष्ट पप गायक’ को अवार्ड प्राप्त गर्नेछन् । www.musickhabar.com (म्यूजिक खबर डटकम)को आयोजना तथा सांस्कृतिक संस्थानको (नाचघर)को सहआयोजनामा हुने यस कार्यक्रममा राष्ट्रिय भाव, पप, लोकदोहोरी, चलचित्र र आधुनिक गीतसंगीतका विभिन्न ३४ विधामा कलाकारहरुले अवार्ड उचाल्नेछन् ।