भोजपुर। उत्तरी साल्पासिलिछो गाउँपालिका वडा नं.२ कुलुङ्गमा वाम गठबन्धनको चुनावी सभा चल्दै गर्दा केहि बेर अघि बम विस्फोट गराईएको छ । सभामा प्रदेश नं. क का उम्मेद्वार राजेन्द्र राईले सम्बोधन गर्दै गर्दा कार्यक्रमस्थलको १ सय मिटर नजिकै बम विस्फोट गराईएको हो ।
बम विस्फोट भएपछि सभा आतंकित भएर तितरवितर भएको थियो । विस्फोटमा कोहि हाताहात नभएको बताईएको छ । अहिले सभा सुचारु भईरहेको छ ।
यसैबीच षडानन्द नगरपालिका १३ तिनतले नजिकैको भीरथाप्लोमा बम विस्फोट हुँदा चुनावी सभा सकेर फर्कदै गरेका युवा संघका कार्यकर्ता विक्रम राई घाइते भएका छन् । त्यसैगरि २ जना प्रहरी पनि घाइते भएको बताइएको छ । बाटोमा राखिएको टाइम बमबारे बुझ्न प्रहरी टोली खटेर गएको र भिड हटाउने क्रममा बम पड्किएको जिल्ला प्रहरी कार्यालय भोजपुरका प्रहरी निरीक्षक गीतनारायण चौधरीले बताए । विस्फोटबाट वाम गठबन्धनको आमसभामा पुगेर सदरमुकाम फर्कदै गरेका युवा संघका सचिवालय सदस्य ट्याम्के मैंयुङ्ग गाउँपालिका वडा नं. ७ दिप्साका विक्रम राईको टाउकोमा चोट लागेको छ ।
घाइते हुने प्रहरीमा प्रहरी सहायक निरीक्षक उमेश मेहता र प्रहरी निरीक्षक देवनारायण यादव रहेका छन् । घाइतेलाई उपचारका लागि सदरमुकाम ल्याइदैछ ।