धनगढी ,४ भदौ- सशस्त्र प्रहरीले चार लाख बराबरको रुद्राक्षको माला कञ्चनपुरबाट बरामद गरेको छ । भन्सार छली गरेर भारततर्फ लैजाँदै गरेको अवस्थामा सशस्त्र प्रहरीको बोर्डर आउट पोष्ट डोकेबजारले माला बरामद गरेको हो ।
९ वटा वोरामा एक हजार आठ सय ६० वटा माला बरामद गरेर आवश्यक कारबाहीका लागि त्रिनगर भन्सार कार्यालय कैलालीलाई बुझाइएको सशस्त्र प्रहरी बल नेपाल नम्बर ३५ गण शैलेश्वरीले जनाएको छ । बहुमुल्य रुद्राक्षमाला विशेष गरि भारत र चिनमा विक्रि वितरण हुनेगरेको रुद्राक्ष व्यावसायीहरु वताउँछन् ।
ती रुद्राक्षका माला बेवारिसे अवस्थामा फेला परेको सशस्त्र प्रहरीले बताएको छ । रुद्राक्ष विशेष गरि प्रदेश नम्वर एकको भोजपुर, संखुवासभाको प्रमुख नगदेवाली भएता पनि पछिल्लो समयमा देशका अधिकांस जिल्लाहरुमा उत्पादन हुने गरेको छ ।
